lundi ed pentcote

Monsieur L' Premier Minisse,
 
 
Sauf vot' respect...mais j'cros que l' lundi d' Pentecôte travaillé mais pas payé ...ch'est eune connerie ! . Mais comme vous avez pas l'air d'vouloir arvénir la dessus , j' ai quand même quetcosse à vous d'minder :
 
 
Vous vénez d' augminter l' Allocation pour Personne Agée de 1,6 % et là , j'vous armercie du fond d'min coeur pour m' belle-mère qu'al est dins eune maison d'artraite.
Avec ches 4,56 euros qu'al aura par mois in plus, al va pouvoir acater un brumisateur parceque ch'ti qu'o z'avez fait distribuer après l'hécatompe d' y a troos ans , il est périmé astheure ( ch'est marqué d'sus !).
 
Par conte là dusque j'vous dis pas merci , ch'est d'avoir augminter les prix d'journée à payer dins ches maisons d'artraite !.  Là Monsieur l' premier Minisse , j' ai l'impression que vous essayez d' nous l'intiquer par l' gros bout , si vous véyez chu que j' veux dire.
Parceque cha fait quand même 102 euros d' plus à payer à la fin du moas pour m' belle mère .
 
Enfin...quand j'dis pour m'belle-mère , je  m'comprinds . Parce que , comme min bieau-père il a travaillé 42 ans  , aux z' Ateliers Centraux , in mourant , il a laiché eune pinsion de 890 euros ...et à ch'compte là...ch'est mi et mes deux bieaux-frères qu'in paie tous les mos les 1350 euros qui manquent  pour l'maison d' artraite à grand-m...   euh à  m'belle-mère !
 
Mi......j'sus solidaire avec ches viux (  j'ai même voté pour Sarlozy  al deuxième tour . .. ch'est vous dire !)...

al question al est pont là Monsieur le Premier Minisse , j'ai toudis trouvé qui fallot donner un cop d'mains à ches viux .....ténez , j'ai même essayé d' comprinte chu que Ségolène  al  avot voulu dire dins sin dernier discours....vous véyez que j'fais des efforts quand même !
 
Mais j'viens d'pinser à quetcosse :
 
J'sus déjà solidaire de m' belle-mère pour l'lundi d'Pentecôte qui arrife..vu que d'toutes manières...ch'est mi qui paie  l'pinsion d ' grand-m  ..euh de m ' belle-mère , à partir du 10 d'chaque mos !
 
Alors là Monsieur l' Premier Minisse ,  deux solutions...ou bien j'sus pas obligé d'aller travailler l ' lundi d' Pentecôte...ou bien ch' jour là..ch'est vous qui payez l' maison d' artraite...
 
Personnellemint , j'préféreros le première solution parce que ch'jour là , ch'est l'ducasse par min bout et que mes pitits éfants y viennent minger de l'tarte à gros bords que m'femme al fait .
 
Bon Monsieur l' Premier Minisse , j 'mets eune enveloppe  timbrée pour la réponse...si qu'o pourrête fait vite parceque ch'est pour savoir si m' femme al  fait de l'tarte ou pas.
 
Merci d'avinche.
 
Bertrand COCQ ( solidaire )
 
NB : M' femme al pourrot faire une tarte un plus si qu'o savez pas quoi faire ch'jour là...cha sérot avec plaisir !.

NB Bis : j'inviteros mes deux bieaux-frères à l'ducasse aussi...